Deputeti i PDK-së, Xhavit Haliti, ndihet i ofenduar nga deklarata e kryeministrit të Kosovës, Albin Kurti, i cili në një intervistë në Zvicër sulmoi kundërshtarët e tij politikë duke thënë shteti helvetik kishte qenë parajsë për opozitën.
Kryeministri i Kosovës, Albin Kurti po qëndron në Davos të Zvicrës ku po merr pjesë në Forumin Ekonomik Botëror. Nga atje, Kurti tha se shteti helvetik ka qenë “parajsë për opozitën”, duke goditur papritur kundërshtarët e tij politikë.
“Unë kam shumë miq këtu. Zvicra ishte një parajsë për opozitën tonë dhe është shtëpia e klasës sonë punëtore, e cila është jashtëzakonisht e rëndësishme për ne me transfertat e parave në shtëpi”, tha Kurti, kur u pyet nga gazetarja e të përditshmes “Blick” për marrëdhëniet e tij me këtë shtet.
Deputeti i Partisë Demokratike të Kosovës, Xhavit Haliti i tha Gazetës Express se Kurti me këtë deklaratë ka ofenduar qindra emigrantë politikë. I tillë ishte Haliti para luftës, pasi kishte qenë i burgosur politik. Nga aktiviteti i tij atje kishte mundur të bëhej edhe një nga udhëheqësit e LPK-së, lëvizjes që i parapriu formimit të Ushtrisë Çlirimtare të Kosovës.
“Ai është nivel i ulët i komunikimit të kryeministrit të vendit”, tha Haliti.
“Zvicra ka qenë strehë e emigracionit politik dhe shtëpi që na e ka mundësu organizmin, jetën politike dhe na ka mundësuar jetën e sigurt që të shpëtojmë prej burgjeve në Jugosllavi. Kjo ka qenë Zvicra. Dhe është jeta e shumë shqiptarëve që i kanë siguruar familjet e tyre përmes punës së ndershme në Zvicër”, tha ai.
Haliti tha se ajo përpjekje e madhe u bë “për t’ia mundësu edhe kryeministrit me ardhë në pushtet dhe me u bë kryeministër”.
“Për mua ai ka ofenduar qindra emigrantë politikë dhe ka ofenduar gjithë atë kontribut që e ka dhënë emigracioni politik dhe ekonomik që ka jetuar dhe ka pasë strehim në Zvicër dhe ka kontribuar edhe për lirinë, edhe për mbijetesën e familjeve nga Kosova”, tha ai.
Një ndër themeluesit e UÇK-së tha se Kurti “nuk ka lidhje” për rolin e emigrantëve politikë në Zvicër.
“Unë besoj që ai nuk ka lidhje, s’e ka as idenë, as informatën më të vogël se cili ka qenë roli i emigracionit politik në Zvicër dhe cili ka qenë roli i emigracionit ekonomik në Zvicër. Prandaj, nuk i lejohen ofendimet e tilla në drejtim të atyre që ia kanë mundësuar atij të bëhet kryeministër”, tha Haliti.
