F.B.
Ministria e Kulturës, Rinisë dhe Sportit ka publikuar renditjen e 35 federatave të kategorizuara në listën preliminare të kategorizimit të sporteve për këtë vit.
Dy federatat më të mëdha në Kosovë, ajo e futbollit dhe basketbollit kanë rënë në Kategorinë B.
FFK-ja ka marrë 83.5 pikë, ndërsa FBK-ja 83.2 pikë. Në këtë kategori është edhe Federata e Boksit e Kosovës me 80.65 pikë.
Vetëm tri federata janë në Kategorinë A. Më së shumti pikë ka Federata e Xhudos e Kosovës, gjithsej 113.57 pikë.
Në kategorinë A është edhe Federata e Hendbollit e Kosovës si e dyta me 87.8 pikë, kurse e Federata e Volejbollit është në vendin e tretë me 85.2 pikë.
Kategorizimi në sport tashmë është kompetencë e plotë e MKRS-së, sipas rregulloreve që janë firmosur më 30 dhjetor të vitit 2022, ndërsa më herët është bërë nga Komiteti Olimpik i Kosovës.
Prej 55 federatave sportive që janë pjesë e Komitetit Olimpik të Kosovës, procesit të kategorizimit i janë nënshtruar 35 federata.
