Dialogu Kosovë-Serbi aktualisht është në një prej momentumeve më të rëndësishme që nga fillimi i negociatave. Berlini dhe Parisi të mbështetura nga Washingtoni janë duke bërë përpjekje që të bindin palët për arritjen e një marrëveshjeje. Nga takimi i fundit në Bruksel është bërë e ditur se Kosova dhe Serbia janë pajtuar për propozimin franko-gjerman, megjithatë mbetet ende punë për aneksin e implementimit. Problematike mbetet edhe çështja e Asociacionit, për të cilin njohës të procesit thonë se mund ta rrezikojë komplet marrëveshjen.
Por a është e mirë për Kosovën kjo marrëveshje bazuar në planin franko-gjerman, pse s’ka njohje reciproke dhe çfarë është diskutuar në Bruksel për modalitetet e implementimit? Për këto në një intervistë ekskluzive për Gazetën Express ka folur profesori i së drejtës ndërkombëtare në Universitetin e Kembrixhit, Marc Weller, i cili është angazhuar për ta ndihmuar Kosovën në këtë proces.
Weller për Marrëveshjen Themelore shprehet se përmban shumë gjëra të cilat i ka kërkuar Kosova dhe për të cilat ka nevojë dhe konsideron se Serbia ka bërë një kompromis shumë të madh.
Për aneksin e implementimit, profesori britanik thotë se ka mbetur ende për t’u diskutuar meqë ka mendime se si do të ndahet çështja e implementimit të 11 neneve të Marrëveshjes Themelore.
Sa i përket Asociacionit, Weller ka thënë se Kosova ka lëvizur nga pozicioni kundërshtues në një qëndrim konstruktiv, dhe thotë se një veprim i tillë ka pasur rezultate. Siç shprehet ai, Perëndimi duhet të jetë i kujdesshëm në këtë momentum që të mos e sjell procesin në një pozitë ku s’do të ketë rrugëdalje, sidomos tani kur Kosova ka lëvizur në një pozicion konstruktiv.
Në thirrjen e tij që Perëndimi të jetë më i kujdesshëm, Weller thekson edhe faktin se Serbia do të përpiqet që ta shfrytëzojë temën e Asociacionit për ta vendosur Kosovën në një pozitë ku mund të gaboj dhe ku mund të vihet në rrezik e gjithë marrëveshja.
