Parlamenti Evropian sot do të votojë dhe do të japë dritën e gjelbër për liberalizimin e vizave për Kosovën pasi ajo ishte e bllokuar për disa vite në Këshill.
Kjo do të mundësojë udhëtimin pa viza për njerëzit nga Kosova në BE deri në 90 ditë, duke filluar nga viti 2024. Kosova është e fundit nga vendet e Ballkanit Perëndimor që ka marrë liberalizimin e vizave, raporton RTKlive.
Të Gjelbrit, duke përfshirë Tomas Waitz dhe paraardhësin e tij Ulrike Lunacek, kanë luftuar që ky hap të hidhet përfundimisht. Thomas Waitz, eurodeputet i të Gjelbërve dhe bashkëkryetar i Partisë së Gjelbër Evropiane, tha se sot është ditë feste për kosovarët.
“Sot është ditë gëzimi për Kosovën dhe qytetarët e saj. Pas vitesh bllokadë në Këshill, Parlamenti Evropian më në fund do të miratojë sot liberalizimin e vizave për vendin më të ri të Evropës. Ky hap në rrugën e Kosovës drejt BE-së është shumë i vonuar. Të Gjelbrit kanë vite që e mbrojnë atë dhe do të vazhdojnë të mbështesin rrugën e Kosovës në BE”,përfundoi Waitz.
