Presidenti i Serbisë, Aleksandar Vuçiq, ka deklaruar se gjithçka që është nënshkruar në dialogun ndërmjet Beogradit dhe Prishtinës dhe që është nënshkruar edhe nga përfaqësuesit e Bashkimit Evropian duhet të zbatohet.
Ai tha se kur është fjala për Asociacionin e Komunave Serbe, nën patronatin e BE-së, janë nënshkruar katër marrëveshje – plani i zbatimit, parimet, menaxhmenti dhe Marrëveshja e Parë.
“Këto janë katër marrëveshje. Ne tashmë kemi nënshkruar gjithçka dhe natyrisht është nënshkruar nga përfaqësuesit e Bashkimit Evropian dhe duhet të zbatohet. Dhe ky nuk është qëllimi përfundimtar. Qëllimi përfundimtar është që serbët dhe shqiptarët të jetojnë së bashku. Të jetojmë shumë më mirë dhe të respektojmë njëri-tjetrin pa hasmëri. Nuk kam në plan të flas për fajin e askujt, nuk ka rëndësi nëse do të ndodhë për tre muaj ose tre vjet, por nëse ia dalim do të jetë historik sukses”, ka thënë Vuçiqi në një intervistë për Euronews, përcjell portali rtv21.tv.
I pyetur nëse po përgatitet për një raund të ri të bisedimeve me përfaqësuesit e Kosovës dhe cilat janë “vijat e kuqe”, presidenti i Serbisë tha se nuk flet shpesh për vijat e kuqe, sepse nëse flitet shumë për atëherë nuk ka negociata reale dhe “pala tjetër do të insistojë vetëm në ato vija të kuqe”.
Është më e rëndësishme, shtoi ai, të flasim siç duhet dhe kjo “do të thotë të përpiqesh të gjesh zgjidhje kompromisi”.
“Ne jemi të gatshëm ta bëjmë këtë. Sigurisht që të dyja palët kanë vijat e tyre të kuqe dhe nuk mund ta mohoj këtë, por ne, besoj se të dyja palët, duhet të bëjmë shumë për të normalizuar situatën mes kombeve tona, popujve tanë dhe Duke e pasur këtë parasysh, besoj se në interes të të dyja palëve të sigurohet qarkullimi i lirë i mallrave, njerëzve dhe kapitalit. Duhet të punojmë me shumë zell për këtë, si dhe për zbatimin e të gjitha marrëveshjeve të mëparshme”, nënvizoi Vuçiqi.
Të shtunën më 18 mars, do të mbahet takimi i radhës mes Kosovës dhe Serbisë në kuadër të dialogut Në njoftimin e Zyrës së Bashkimit Evropian bëhet e ditur se takimet e ndara do të zhvillohen duke filluar në ora 10:00, ndërsa ai trepalësh pas mesditës.
“Duke filluar nga ora 10:00, shefi i politikës së jashtme të Bashkimit Evropian, Josep Borrell dhe i dërguari i BE-së për dialogun Kosovë-Serbi, Mirosllav Lajçak, do të zhvillojnë takime të ndara me kryeministrin e Kosovës Albin Kurtin dhe me presidentin serb Aleksandar Vuçiq”, thuhet në njoftim.
