Presidenti i Serbisë, Aleksander Vuçiq tha se qeveria e tij vendosi të enjten në mbrëmje që sonte t’i dërgojë komandatit të forcave paqeruajtëse të NATO-s në Kosovë, kërkesën për të lejuar kthimin e disa “qindra, deri në njëmijë forca serbe të sigurisë në Kosovë”. Ai tha se kërkesa do të dorëzohet sonte komandatit të KFOR-it nëpërmjet postës elektronike, ndërsa nesër edhe personalisht me letër.
Ai tha se kjo është hera e parë që një qeveri e Serbisë e bën një kërkesë të tillë. “Nuk mendoj se ekziston mundësia që ata ta pranojnë kërkesën tonë, jo pse është e keqe, sepse po të mendonin më mirë kjo do t’i ndihmonte paqes, uljes së tensioneve dhe mundësisë për të gjetur një zgjidhje kompromisi”, tha presidenti serb.
Beogradi i referohet Rezolutës1244 të Këshillit të Sigurimit të Kombeve të Bashkuara, të vitit 1999 në të cilën parashihej kthimi i një numri të përsonelit ushtarak dhe policor jugosllav për të kryer disa funksione si “ndërlidhja me misionin civil ndërkombëtar dhe me praninë ndërkombëtare të sigurisë; shënjimin/ pastrimi i fushave të minuara; mbajtjen e një pranie pranë objekteve të trashëgimisë serbe; mbajtjen e një pranie në vendkalimet kyesore kufitare”.
