F.B.
Holanda mposhti 2-1 me përmbysje Turqinë në një takim tepër të luftuar dhe u rikthye pas 20 vitesh në gjysmëfinalet e një Europianit.
Skuadra e Ronald Koeman do të ketë përballë Anglinë në “Signal Iduna Park” (10 korrik) në “betejën” për një biletë në finalen e madhe të Berlinit.
Turqit iu afruan disa herë barazimit gjatë minutave të fundit, por portieri tulipan Bart Verbruggen u shfaq në lartësinë e duhur me pritjet e tij.
21-vjeçari, i cili është pjesë e Brightonit në Premier League, nuk i kursen elozhet për shokët e skuadrës. Të cilët sakrifikuan pafund në mbrojtje të rezultatit.
“Dukej sikur të kishim 6 portierë. Shumë djem vendosën zemrat e tyre në mbrojtje të portës, duke dhënë gjithçka që kishin kur duhej.
Një gjë e tillë të jep një ndjenjë sigurie të madhe si portier kur të gjithë sakrifikojnë për të ruajtur avantazhin.
Ne e dinim që Turqia do të reagonte. Por me ndihmën e shokëve isha shumë i qetë mes shtyllave”, u shpreh Verbruggen.
