Ushtarit hungarez të KFOR-it, i cili ishte plagosur gjatë trazirave të fundit në veri të Kosovës nga bandat kriminale serbe, iu ka amputuar këmba. Lajmin e ka bërë të ditur Ministria e Mbrojtjes së Hungarisë.
Ushtarët të cilët janë plagosur në Zveçan dhe komunat tjera veriore ishin kthyer në Hungari një ditë pas plagosjes, me aeroplanin e Mbrojtjes Kombëtare hungareze, raporton Telex.
“Për rikuperimin e tyre, Forcat Hungareze të Mbrojtjes dhe mjekët ushtarakë po bëjnë gjithçka në maksimum. Pavarësisht nivelit të lartë të kujdesit mjekësor, pas një konsultimi paraprak me pacientin, duke marrë parasysh rezultatet e trajtimeve të ofruara që nga lëndimi, një prej tyre kërkonte një ndërhyrje me amputim të gjymtyrëve, e cila u krye të premten në Institutin Kombëtar të Rehabilitimit Mjekësor. Operacioni ka shkuar mirë, gjendja e pacientit është stabile”, thuhet në njoftimin e ministrisë së Mbrojtjes së Hungarisë, transmeton RTKlive.
Pak çaste pas rikthimit të tyre me aeroplan, Ministri i Mbrojtjes Kombëtare, Kristóf Szalay-Bobrovniczky, kishte raportuar për gjithsej 27 ushtarë hungarezë të lënduar. Shumica e tyre janë në gjendje të mirë shëndetësore, por dy nga ta janë ende duke u trajtuar në spital.
