Forcat e Ukrainës po bëjnë më shumë përparim në rajonin jugor të Zaporizhzhia të vendit, ndërsa trupat ruse kanë intensifikuar sulmet në zonat përreth qytetit të sulmuar të Kupiansk në vijën e frontit lindor, tha ushtria ukrainase të dielën, raporton CNN.
Rreth Kupiansk: Rusia “ka rritur ndjeshëm numrin e sulmeve. Që nga dje, armiku granatoi pozicionet e mbrojtësve tanë 620 herë dhe kreu 15 sulme ajrore,” tha Illya Yevlash, një zëdhënës i forcave të Ukrainës në frontin lindor.
“Megjithatë, targeti i armikut ka ndryshuar disi. Ata po e zhvendosin fokusin e tyre nga sektori Kupiansk në Novoiehorivka,” shtoi Yevlash, duke iu referuar një fshati në verilindje të Kupiansk.
Forcat ukrainase zmbrapsën 10 sulme në zonë gjatë ditës së djeshme, tha zëdhënësi.
Granatimet ruse rreth Kupiansk kanë qenë kaq intensive javët e fundit saqë kanë shkaktuar një nga evakuimet më të mëdha të Ukrainës nga konflikti.
Nga ana tjetër, Ukraina është ende në ofensivë në drejtimin Bakhmut dhe vazhdon të përparojë “metër pas metër”, tha Yevlash. Gjatë ditës së kaluar, sipas zëdhënësit, forcat ruse granatuan pozicionet e Ukrainës 590 herë, duke përdorur raketahedhës të shumtë dhe top-artileri të kalibrave të ndryshëm.
Gjithsej 14 angazhime luftarake u zhvilluan të shtunën, tha Yevlash. “Armiku po përdor kundërsulme, duke u përpjekur më kot të rifitojë terrenin e humbur,” shtoi ai, duke vënë në dukje se taktikat e Rusisë “mbeten praktikisht të pandryshuara” në zonë.
Që kur grupi ushtarak privat Wagner pretendoi se kishe pushtuar qytetin lindor në maj, Ukraina ka pohuar se është ende duke luftuar për Bakhmutin dhe duke marrë përfitime në territorin që rrethon qytetin.
