Sekretari amerikan i shtetit, Antony Blinken bëri një vizitë të paparalajmëruar në Irak të dielën, teksa viziton Lindjen e Mesme duke u përpjekur të zbusë tensionet pas shpërthimit të luftës midis Izraelit dhe Hamasit.
Pas një vizite të mëparshme në Bregun Perëndimor të pushtuar, Blinken zbarkoi në Bagdad mbrëmjen e së dielës për vizitën e tij të parë në vend si kryediplomati amerikan dhe zhvilloi bisedime me kryeministrin Mohammed al-Sudani.
Uashingtoni dëshiron të parandalojë një konflikt më të gjerë rajonal dhe ka rritur diplomacinë me vendet e rajonit, popullsia e të cilave është zemëruar nga sulmi i Izraelit në Gaza.
Blinken zbarkoi në aeroportin ndërkombëtar të Bagdadit, veshi një jelek balistik dhe udhëtoi me helikopterin Black Hawk për në Zonën e Gjelbër. Në rezidencën e ambasadorit amerikan, ai u informua për kërcënimet ndaj objekteve të SHBA-së, përpara se të shkonte në zyrën e kryeministrit.
Ai do të udhëtojë për në Turqi më vonë të dielën, ku janë mbajtur edhe disa protesta. Grupi i mbështetur nga Irani, Kataib Hezbollah lëshoi një paralajmërim të shtunën mbrëma se vizita e pritshme e Blinken do të përballej me “një përshkallëzim të paprecedentë”.
Zyrtarët amerikanë të mbrojtjes thonë se sulmet me raketa dhe dron mbi trupat e SHBA-së dhe të koalicionit janë shtuar në Irak dhe Siri që nga sulmet vdekjeprurëse të Hamasit më 7 tetor që shkaktuan një fushatë intensive ushtarake izraelite në Gaza.
