F.B.
Sot do të zhvillohen tri ndeshjet e fundit të javës së 27-të në Superligën e Kosovës.
Llapi, që do të jetë nikoqir i Lirisë në “Zahir Pajaziti”, me një fitore eventuale mund të bëhet lider i ri në tabelë.
Pas barazimit të Ballkanit dje me Prishtinën, tani diferenca e pikëve mes therandasve dhe llapjanëve është vetëm dy pikë. Ballkani ka 53 pikë, kurse Llapi 51.
Skuadra nga Podujeva llogaritet favorite absolute ndaj Lirisë së “pafuqishme”, e cila është e fundit në tabelë me vetëm 10 pikë të grumbulluara.
Gjilani – Dukagjini është sfida tjetër për ditën e sotme. Gjilanasit po “luftojnë” për t’i ikur pozitës së barazhit, derisa klinasit nuk është se rrezikojnë rënien nga Superliga.
Gjilani është i shtati në tabelë me 26 pikë, kurse Dukagjini i pesti me 34 sosh.
Ndeshje interesante pritet të jetë edhe ajo në stadiumin “Rexhep Rexhepi” të Drenasit, mes Feronikelit ’74 dhe Fushë Kosovës.
“Nikli” momentalisht ndodhet në pozitën e tetë me 26 pikë të grumbulluara, pozitë e cila ia siguron ndeshjen e barazhit për të qëndruar në elitë.
Ndërsa, Fushë Kosova që po kalon formë të mirë xhirove të fundit, është e parafundit me 20 pikë dhe po synon që së paku të shmang rënien direkte në Ligën e Parë.
Të tri ndeshjet e sotme janë të parapara për t’u zhvilluar nga ora 15:00.
