Festat tona fetare duhet të shfrytëzohen për të sjellë lumturi dhe gëzim në zemër të atyre që kanë nevojë. Kështu është shprehur myftiu i Kosovës, Naim Tërnava në mesazhin e urimit për festën e Kurban Bajramit.
“Nesër është dita e Kurban Bajramit, ditë feste për besimtarët myslimanë në të gjithë botën. Edhe ne në Kosovën tonë i gëzohemi kësaj feste kaq madhështore, e cila shfaqet në shoqërinë e në familjet tona me gëzime e hare, e me një gjuhë falënderuese, duke u përhapur në mesin e të gjithë besimtarëve. Le të festojmë duke trajtuar të sëmurit e duke vizituar të afërmit. Duke shkëmbyer urime me miqtë dhe duke i mbjellë këto vlera në mendjet dhe zemrat e fëmijëve dhe të rinjve tanë. Vetëm kështu forcojmë edhe më shumë trungun tonë familjarë dhe e ushqejmë atë mes vlerash kombëtare e fetare dhe e ruajmë atë me një pastërti fisnike, ashtu siç e kemi amanet nga të parët tanë”, ka theksuar myftiu Tërnava.
“Ju uroj për këtë festë, e cila karakterizohet me kryerjen e haxhit dhe sakrificës së Kurbanit, për t’iu afruar kështu edhe më afër mëshirës së pafund të Zotit. Njëherësh ju uroj ditën e çlirimit të vendit tonë për të cilën ditë u sakrifikuan breza të shumtë që Kosova të fitojë pavarësinë e saj”, ka shtuar ai.
Tërnava tutje ka thënë se së bashku me miliona haxhilerë nga mbarë bota, të cilët sot gjenden në Mekën e shenjtë për ta kryer haxhin, janë edhe një numër i vëllezërve dhe motrave tona nga Kosova dhe vendeve tjera shqiptare, por edhe nga mërgata e largët, e të cilët bëjnë lutje për faljen e mëkateve dhe për begati nga Krijuesi Fuqiplotë.
Tërnava i është lutur Zotit për paqe dhe tolerancë në vendin tonë, por edhe për rikthim të paqes në Palestinë e Ukrainë.
“Ne si qytetarë të këtij vendi, duhet të punojmë në promovimin e paqes, përhapjen e vëllazërisë dhe tolerancës, larg konflikteve dhe luftërave, gjithherë të gatshëm për t’i konsoliduar vlerat e vëllazërisë dhe bashkëjetesës njerëzore. Le të mbetet kjo festë simbol i sakrificës, shërbimit dhe bindjes ndaj Zotit të Plotfuqishëm, me thirrjen për qytetarët që të frymëzohen nga kuptimet e unitetit, dashurisë dhe paqes, e larg urrejtjes e përçarjeve”, ka nënvizuar Tërnava.
