F.B.
Duket sikur Erik ten Hag kishte gjetur punën ideale pasi mori drejtimin e Bayer Leverkusen në muajin maj dhe nënshkroi një kontratë tre-vjeçare me Farmacistët, por bashkëpunimi midis holandezit dhe klubit gjerman u ndërpre pas vetëm dy ndeshjesh në Bundesligë.
Puna në Leverkusen për Ten Hag supozohej të ishte një rikthim në skenën e madhe dhe në një klub që, i udhëhequr nga Xabi Alonso, arriti sukses historik.
Megjithatë, qëndrimi i tij në këtë pozicion ishte jetëshkurtër, duke pasur parasysh se u shkarkua pas humbjes ndaj Hoffenheimit dhe barazimit me Ëerder Bremen. Ai arriti fitoren e tij të vetme në Kupë kundër ekipit të ligës më të ulët Sonnenhof Großaspach.
Tani kanë dalë në dritë detajet e paketës së tij të jashtëzakonshme të kompensimit për largimin nga puna e ish-trajnerit të Manchester United.
Sipas gazetës gjermane Sport Bild, shkarkimi i holandezit do t’i kushtojë klubit pothuajse 6 milionë euro në formë kompensimi për ndërprerjen e kontratës.
Kur kësaj i shtohet edhe paga e tij për dy muajt e kaluar në stol, shifra që Ten Hag i kushtoi klubit del të jetë rreth 100,000 euro në ditë gjatë qëndrimit të tij 62-ditor në krye të ekipit gjerman.
Ten Hag është sërish në kërkim të një pune të re, dhe pas dy shkarkimeve në më pak se një vit, reputacioni i tij është dëmtuar ndjeshëm dhe mbetet për t’u parë se ku do ta vazhdojë karrierën e tij.
