Përfaqësuesit e disa klubeve të futbollit, në total prej rreth 14 vetash, siç merr vesh “Gazeta Express”, po zhvillojnë takim brenda ambienteve të Federatës së Futbllit të Kosovës.
Ky takim është ftuar nga Tahir Batatina i Llapit dhe Avni Haxhiu i Trepçës, të dy këta që në futbollin e Kosovës njihen si njerëz të afërt dhe përkrahës të mëdhenj të Agim Ademit.
Siç merr vesh “Gazeta Express”, ky takim është ftuar për të diskutuar për moslicencimin e FFK-së pasi 31 marsi po afrohet, kur edhe mbyllet viti fiskal.
Ideja ka qenë që pas këtij takimi, klubet ta kërkojnë një takim me ministrin e sportit, Hajrulla Çeku, për të kërkuar licencë për futbollit, ose në të kundërtën, ideja ka qenë që të paralajmërohet protestë e klubeve para Ministrinë.
Por, një numër i konsiderueshëm i klubeve, madje edhe disa të mëdha si Prishtina, Drita, Trepça ’89 etj, e kanë refuzuar pjesëmarrjen në këtë takim.
Ato i kanë thënë “Gazetës Express” se takimi ishte thirrur në restorantin “Marco Polo”, por që në fund takimi është zhvilluar në ambientet e FFK-së, pas kritikave të kryetarit të Trepçës ‘89, Abedin Zekës dhe të atyre që nuk morën pjesë në takim.
“Kur ne i ftuam në takim ata, na thoshin se ka kaluar koha e kafeneve. E sot vetë na thirrën në kafene”, tha Abedin Zeka për “Express”.
Duket se këto kritika kanë bërë që takimi të ndërrojë destinacion, pra të mbahet në FFK, të cilës para disa javësh ia kishin mësyrë edhe disa klube të tjera si Prishtina, Drita, Trepça ’89, e kishin kërkuar një takim për të diskutuar pikërisht për çështjen e licencimit, por dyert e FFK-së i kishin gjetur të mbyllura.
