F.B.
Policia e Kosovës ka njoftuar se tre zyrtarë policorë kanë pësuar lëndime derisa ishin në kryerje të detyrës zyrtare pasi janë goditur nga tre persona të panjohur.
Sipas njoftimit sulmi ka ndodhur të hënën në rrugën “Gursel dhe Bajram Sylejmani”, në Ferizaj.
“Tre zyrtar policorë kanë pësuar lëndime derisa ishin në kryerje të detyrës zyrtare pasi që një veturë në lëvizje në të cilën gjendeshin tre persona të panjohur i ka goditur zyrtarët, të cilët i kishin dhënë urdhër të dyshuarve për t’u ndalur me veturë”, thuhet në njoftim.
Të dyshuarit, në tentativë për t’u larguar nga vendi i ngjarjes, kanë shkaktuar aksident dhe e kanë braktisur veturën.
Tutje u tha se gjatë kontrollit në veturën e braktisur janë gjetur dhe konfiskuar 4.1 gramë substancë e dyshuar narkotike e llojit marihuanë dhe 0.2 gramë substancë e dyshuar narkotike e llojit kokainë.
Nuk raportohet për të arrestuar, ndërsa rasti është në hetime.
