Rusia dhe Emiratet e Bashkuara Arabe kanë kërkuar një takim urgjent të Këshillit të Sigurimit të OKB-së nesër në mëngjes për të diskutuar zhvillimet në Lindjen e Mesme pas bombardimit të një spitali në Gaza që vrau qindra palestinezë, njoftoi agjencia e lajmeve Reuters, duke cituar burime diplomatike.
Kreu i Ligës Arabe i bëri sot thirrje Perëndimit që të ndërhyjë menjëherë për të “ndaluar tragjedinë në Gaza” pas bombardimit të një spitali që vrau qindra palestinezë. Ahmed Abul Yait dënoi sulmin vdekjeprurës, duke e quajtur atë një “krim lufte” dhe duke paralajmëruar se autorët do të sillen para drejtësisë.
“I bëj thirrje gjithë njerëzimit të ndërmarrë veprime për të ndalur këtë brutalitet të paprecedentë në Gaza”, tha presidenti turk Rexhep Tajip Erdogan, duke iu referuar bombardimit të një spitali “në të cilin kishte gra, fëmijë dhe civilë të pafajshëm”.
Ministria e Jashtme e Iranit ka dënuar sulmin izraelit në një spital në Gaza, i cili vrau dhe plagosi qindra “njerëz të paarmatosur dhe të pambrojtur”.
Ministria e Punëve të Jashtme të Katarit flet për një “përshkallëzim të rrezikshëm” të sulmeve izraelite në Rripin e Gazës, duke vënë në dukje se spitalet, shkollat dhe qendrat urbane tashmë po preken.
Në Jordani, Ministria e Punëve të Jashtme lëshoi një deklaratë duke dënuar bombardimin e një spitali në Gaza, duke i bërë thirrje komunitetit ndërkombëtar të mbrojë popullin palestinez dhe të bëjë përpjekje të përbashkëta për t’i dhënë fund luftës.
Ministria e Jashtme egjiptiane kërkoi gjithashtu ndërhyrjen e menjëhershme të komunitetit ndërkombëtar. /Abc news
