Komisioni Qendror i Zgjedhjeve (KQZ) njofton se sot, përfundon afati për regjistrimin dhe evidentimin e votuesve me lëvizje të kufizuar në institucione, për zgjedhjet lokale për kryetarë të komunave dhe për kuvende komunale, të cilët nuk mund të votojnë në vendvotimin e tyre më 12 tetor 2025.
KQZ-ja thekson se ky regjistrim përfshin votuesit me zotësi juridike që ndodhen në hospitalizim, shtëpi për të moshuarit, institucione të shëndetit mendor, burgje dhe qendra paraburgimi.
KQZ-ja, në bashkëpunim me institucionet përkatëse, ka realizuar evidentimin e këtyre votuesve, të cilët konsiderohen të regjistruar në mënyrë automatike.
“Votuesit që ndodhen në këto institucione mund të regjistrohen gjithashtu edhe individualisht përmes platformës elektronike të KQZ-së, e cila mbetet aktive deri më 7 tetor 2025 në adresën: https://vpnv.kqz-ks.org”, thuhet në njoftim.
Gjithashtu, për votuesit me nevoja të veçanta që nuk mund të dalin nga shtëpitë e tyre për shkak të paaftësisë fizike apo shëndetësore, si dhe për ata në rrethana të veçanta si arresti shtëpiak apo për shkak të masave të sigurisë, regjistrimi vazhdon deri më 7 tetor 2025. Këta votues mund të regjistrohen përmes platformës elektronike ose nëpërmjet Komisioneve Komunale të Zgjedhjeve në komunat përkatëse.
Në ditën e zgjedhjeve, më 12 tetor 2025, KQZ-ja do të angazhojë ekipe mobile në çdo komunë të Kosovës, të cilët do të shkojnë në adresat e votuesve të regjistruar që nuk mund të paraqiten në vendvotim për të siguruar ushtrimin e të drejtës së tyre të votës.
KQZ fton të gjithë qytetarët që kanë nevoja të veçanta të bëjnë regjistrimin brenda afateve të përcaktuara, për të garantuar pjesëmarrjen e tyre në procesin zgjedhor.
