Presidentja Vjosa Osmani, me ftesë të Sekretarit të Shtetit të SHBA-së, Antony Blinken, po qëndron në Uashington. Ajo sot do të marrë pjesë në aktivitetin e organizuar nga Departamenti Amerikan i Shtetit për Gratë, Paqen dhe Sigurinë.
Nga sot e deri më 11 korrik, në Uashington do të mbahet Samiti i NATO-s, për të shënuar 75 vjetorin e organizatës më të madhe ushtarake në botë.
Samiti treditor do të fokusohet në mënyrat për të siguruar Ukrainën për mbështetjen e qëndrueshme të NATO-s dhe do t’u ofrojë disa shpresa qytetarëve të saj të lodhur nga lufta se vendi i tyre mund t’i mbijetojë konfliktit më të madh tokësor në Evropë në dekada.
Ky samiti shërben si një platformë për shtetet anëtare dhe shtetet partnere që të bashkëpunojnë për çështjet të sigurisë globale dhe ta riafirmojnë përkushtimin e tyre për një të ardhme më të sigurt.
“Përfshirja e Kosovës në aktivitetin e organizuar nga Sekretari Blinken dedikuar Agjendës për Gratë, Paqen dhe Sigurinë është tregues i fuqishëm i rolit në rritje që po luan Kosova në avancimin e kësaj agjende në nivel global dhe përkushtimit të saj ndaj parimeve dhe vlerave të mbështetura nga NATO-ja”, ka thënë presidentja Osmani.
Ndër të tjera, thuhet se gjatë qëndrimit në Uashington, presidentja Osmani do të zhvillojë edhe aktivitete dhe takime të tjera ku do të diskutohet forcimi i bashkëpunimit me qëllim të kontributit për paqe dhe siguri në rajonin tonë e më gjerë.
Ndryshe Zyra e Presidentes është përzgjedhur në mesin e tre partnerëve globalë nga Zyra e sekretarit Blinken për ta themeluar Qendrën Rajonale të Ekselencës për Gratë, Paqen dhe Sigurinë. Marrëveshja për themelimin e kësaj Qendre është nënshkruar nga presidentja Osmani dhe Zyra e Sekretarit Blinken në prill të këtij viti gjatë Forumit për Gratë, Paqen dhe Sigurinë.