Manchester City dhe Manchester United, sot pasdite do të përballen në finalen e madhe të FA Kupës së Anglisë.
Dy rivalët e Mançesterit, do të ballafaqohen në ‘Wembley’ në një finale që parashikohet të sjellë një sfidë të zjarrtë.
‘Qytetarët’ synojnë tripletën këtë sezon të garave, dhe për ta bërë këtë duhet mposhtur Unitedin, e më pas Interin në finalen e Ligës së Kampionëve.
Ndërkaq, United kërkon trofeun e dytë këtë sezon të garave pas atij të EFL Cup.
Trajneri i Unitedit, Erik ten Hag, beson se skuadra e tij, mund ta mposht Cityn dhe ta fitojë këtë trofe.
“Unë thashë vitin e kaluar, ne duam të rikthejmë Unitedin, por kemi një rrugë të gjatë për ta bërë”, ka thënë ai.
“Ne duam të fitojmë një kupë, nuk ka të bëjë me ndaljen e Cityt, është për të fituar Kupën. Ne kemi një mundësi të madhe”, ka thënë Ten Hag.
Fitore në finalen e FA Kupës, kërkon edhe Pep Guardiola, trajner i Cityt.
“Ajo që Manchester United po bën në pesë apo gjashtë muajt e fundit flet se është një ekip krejtësisht tjetër nga ai që u përballëm në fillim të sezonit”, ka thënë Guardiola. Është vetëm një ndeshje kështu që ne duhet të jemi më të mirë për ta fituar”, ka pohuar Guardiola.
Finalja mes Cityt dhe Unitedin luhet në ‘Wembley’ dhe fillon në orën 16:00.
