Sonte (e mërkurë) çelet edicioni XVI i Panairit të Librit në Prizren që organizohet nga Instituti për Kulturë dhe Kërkime Sociale dhe do të mbyllet të dielën.
Në rrjetin social Facebook, përgjegjësi i programit letrar të Panairit të Librit në Prizren, Ditar Kabashi, ka njoftuar se do të ketë pjesëmarrje të shtëpive botuese nga Kosova dhe nga vendet e rajonit dhe orë letrare me shkrimtarë dhe studiues të spikatur.
Sipas tij, autorët që do të përurojnë veprat e tyre janë: Adil Olluri, Roland Spahiu, Qerim Lita, Merita Kuçi, Skënder Zogaj, Xhevair Lleshi, Fjolla Spanca, Engin Noyan dhe Donika Dabishevci, kurse një orë letrare do t’i kushtohet veprimtarisë artistike të shkrimtarit të ndjerë Haqif Mulliqi.
Mbrëmjet letrare do të drejtohen nga Ditar Kabashi dhe Osman Goranci, ndërsa promovimet e librave do të realizohen në Kej.
Edicioni XVI i Panairit të Librit në Prizren mbështetet nga komuna e Prizrenit dhe MKRS dhe do të mbahet deri më 28 korrik 2024.
