Ka dështuar mbledhja e sotme e Komisionit për Media në Kuvendin e Kosovës për mungesë kuorumi.
Në fakt, deputetët e opozitës edhe pse ishin të pranishëm nuk kanë marrë pjesë në votim dhe si rrjedhojë nuk ka kaluar rendi i ditës, në të cilin pritej të shqyrtoheshin Raportet e Komisioneve të Përhershme për Projektligjin për plotësim/ndryshimin e Ligjit të Këshillit të Pavarur Mbikëqyrës Civil të Kosovës dhe raporti i Këshillit të Pavarur për media. Të pranishëm në këtë mbledhje ishin edhe përfaqësuesit e KPM-së dhe ARBK-së. Deputeti i PDK-së, Mërgim Lushtaku theksoi se subjekti i tij politik e ka bërë të qartë se nuk do të merr pjesë as në kuorum dhe as në votime të ligjeve të caktuara, por se janë të gatshëm për të qenë pjesë e diskutimeve. Ai e vlerësoi papërgjegjësi të mazhorancës moskrijimin e numrave të nevojshëm për kuorum.
Në anën tjetër, kryetari i këtij komisioni, Valon Ramadani theksoi se qëndrimet politike janë e drejtë e secilës parti, por sipas tij është e padrejtë që në këto mbledhje, por edhe në seancat e Kuvendit deputetët të nënshkruhen dhe të marrin mëditje. “Është i drejtë qëndrimi politik, por ju e keni kërkuar bashkë me neve këtë mbledhje dhe tani nuk merrni pjesë as sa për të filluar ai diskutim që është me shumë interes për qytetarët, por në fund nënshkruhen dhe i merrni mëditjet, kjo nuk është e drejtë”, ka thënë Ramadani. Ndaj pohimeve të kryesuesit replikoi deputeti i LDK-së, Agim Veliu, i cili tha se kur thuhet se diçka është e padrejtë ajo duhet të argumentohet. “Kjo që po insistoni ta disiplinoni opozitën që ajo të votojë sipas dëshirës tuaj, këtë nuk mund ta arrini, prandaj as mos bëni përpjekje. Nëse mendoni se diçka është e padrejtë e në kundërshtim me rregulloren e punës së Kuvendit mund të kërkoni interpretim ligjor lirisht”, ka thënë Veliu.
Ndërkohë, pas diskutimeve dhe replikave, kryesuesi i këtij Komisioni bëri me dije se mbledhja e re do të caktohet më së largu deri te premten.
