F.B.
Departamenti Amerikan i Shtetit se e ka futur në listën e zezë ish-kreun e komunës së Kaçanikut, Xhabir Zharku, për shkak të, siç thuhet, përfshirjes së tij në akte korruptive.
Sipas njoftimit të Departamentit të Shtetit, në këtë listë është edhe ish-kryeprokurorja speciale e Maqedonisë së Veriut, Katica Janeva, kryetari aktual i Karposhit në Maqedoninë e Veriut, Stevço Jakimovski.
Në një njoftim të Departamentit të Shtetit thuhet se në cilësinë e tij zyrtare si kryetar i komunës së Kaçanikut,, Zharku ishte i përfshirë në akte korruptive, duke përfshirë përdorimin e pozitës së tij për të ndërhyrë në proceset e prokurimit për të lejuar në mënyrë të paligjshme,ndërtimin në pronën në pronësi të komunës, për të përfituar vetë dhe bashkëpunëtorët e tij.
Ndryshe Zharku edhe më herët kishte pasur probleme me drejtësinë në Kosovë, më 2011, ai ishte dënuar me tre vjet burgim për veprën penale të detyrimit dhe armëmbajtjes pa leje. Pas konfirmimit të vendimit ai ishte larguar nga Kosova dhe për gati pesë vjet e gjysmë kishte qëndruar në arrati në Suedi.
Kurse në cilësinë e saj zyrtare si ish-kryeprokurore speciale e Maqedonisë së Veriut, Janeva në njoftimit e DASH thuhet se ajo ishte e përfshirë në akte korruptive, duke përfshirë përdorimin e ndikimit të saj politik dhe pushtetit zyrtar për përfitime personale. Ka informacione të besueshme që Janeva ka kërkuar dhe ka pranuar ryshfet për të ndikuar në një prokurori nën kompetencën e saj.
Ndërsa për cilësinë e tij zyrtare si kryetar i komunës së Karposhit, Maqedonia e Veriut, Jakimovski, nga Departamenti amerikan i Shtetit thuhet se ai ishte përfshirë në akte korruptive, duke përfshirë përdorimin e pozitës së tij zyrtare për të ndërhyrë në zhvillimin urban dhe proceset e prokurimit, për të përfituar veten dhe bashkëpunëtorët e tij.
DASH thotë se këto emërtime riafirmojnë përkushtimin e SHBA-së për të mbështetur sundimin e ligjit dhe forcimin e institucioneve demokratike në të gjithë Ballkanin.
“Departamenti do të vazhdojë të përdorë të gjitha autoritetet në dispozicion për të promovuar llogaridhënien për aktorët e korruptuar në rajon dhe në botë”, thuhet në njoftimin e DASH.
Po ashtu në njoftim thuhet se të sanksionuarve dhe anëtarëve të ngushtë të familjeve të tyre u ndalohet hyrja në Shtetet e Bashkuara.
