Skemës programe të Radio Televizionit të Kosovës së shpejti iu shtohet seriali vendor, “Tosta te Suki”.
Nëpërmjet pjesëve komike, seriali do t’i sjellë shikuesve të transmetuesit publik shpërfaqje të jetës së përditshme. Këtë e tregon edhe vet emërtimi i serialit, i cili do të jetë i drejtuar nga regjisori i mirënjohur, Astrit Kabashi.
Përveç temave të përzgjedhura, fakti tjetër që do t’i mbaj të lidhur shikuesit para ekranit do të jetë edhe kasta e aktorëve. Me një profesionalizëm të rrallë, ata do të dëshmojnë potencialin aktoresk duke pasuruar skemën programore të RTK-së.
Bujar Ahmeti është kryeprotagonisti ndërkaq në role tjera luajnë Agron Shala, Fatos Kryeziu e të tjerë.
E ky serial televiziv do të nisë pikërisht në vjeshtë, për t’i dhënë tjetër gjallëri shikuesve pas emisioneve dhe materialeve të shumta të verës.
Seriali është produksion i jashtëm që është përzgjedhur nga komisioni vlerësues pas thirrjes publike, në një garë ku u shqyrtuan mbi 25 aplikacione.