F.B.
Kombëtarja e Rumanisë ka nisur me fitore evropianin në grupin E, pasi mposhti me lehtësi sot Ukrainën me rezultat 3:0.
Rumunët u treguan në çdo aspekt më të përgatitur në “Allianz Arena” të Munihut, duke arkëtuar tri pikë të rëndësishme në luftën për raundin e ardhshëm.
Serinë e golave për të përzgjedhurit e Edward Iordanescu e nisi Nicolae Stanciu në minutën 14, për të vazhduar me Marius Marin në minutën 53 dhe Denis Dragush katër minuta më vonë për rezultatin 3:0.
Në grupin E janë edhe Sllovakia e Belgjika, të cilat do të luajnë sot nga ora 18:00.
Rumania ndeshjen e dytë në grup do ta zhvillojë kundër Belgjikës më 22 qershor nga ora 21:00, ndërsa Ukraina ndaj Sllovakisë më 21 qershor nga ora 15:00.
Belgjika është favorite në Grupin E, që do të thotë se Rumania, Ukraina dhe Sllovakia do të luftojnë për pozitën e dytë dhe të tretë.
Për kujtesë, dy kombëtare nga secili grup kalojnë në fazën e 16-të, ku do të kalojnë edhe katër nga gjashtë kombëtaret më të mira të vendit të tretë.
Rumania po merr pjesë në EURO-n e saj të gjashtë, por e para qe nga viti 2016, ndërsa Ukraina po luan në Kampionatin Evropian për herë të katërt radhazi.
