Drejtuesit e Radio Televizionit të Kosovës, kanë filluar serinë e debateve me publikun për raportin vjetor të punës së RTK-së për vitin 2023. Drejtori i Përgjithshëm, Shkumbin Ahmetxhekaj, ka shpalosur detaje të raportit gjatë takimit me prodekanin, Edmond Beqiri dhe para kuadrit të Universitetit ‘Haxhi Zeka’ në Pejë.
Drejtori i Përgjithshëm i RTK-së, Shkumbin Ahmetxhekaj, në debat me studentët e Universitetit ‘Haxhi Zeka’ në Pejë, ka thënë gjatë vitit 2023, transmetuesi publik ka kaluar shumë sfida, por ka pasur edhe suksese.
Ahmetaxhekaj duke shpalosur raportin e punës për vitin e kaluar ka thënë se është pasuruar skema programore me emisione të reja, janë siguruar të drejtat sportive, është realizuar Festivali i Këngës, si dhe janë bërë investime në produksion dhe në rrjetin e transmetimit të Radio Kosovës.
“Projekti jonë i madh është që shumë shpejtë fillojmë me një kanal online për të rinjtë që do të quhet ‘RTK Zonë’. ‘RTK Zonë’ do të ketë target moshat nga 13 deri në 29 vjeç. Ne do të kemi gazetarë nga të gjitha komunat e Kosovës, gazetarë të rijnë të cilët jo domosdoshmërisht do të jenë me kontrata të rregullta, por është koncepti i ri i freelanserave. Ne kemi hapur Zyrën në Prizren dhe në Mitrovicë dhe mund të themi se Zyra në Prizren është mjaft e suksesshme. Arsyeja e zgjerimit të RTK-së ka të bëjë me idenë që ne të jemi më afër qytetarëve. Nga shtatori rikthejmë Ligen e Kampionëve për adhuruesit e futbollit, Evropa Ligen dhe Konferencë Ligen”, ka theksuar ai.
Gjatë debatit studentët pjesëmarrës janë interesuar për punën e RTK-së, duke parashtruar pyetje, për të cilat kanë marrë përgjigje nga drejtori Ahmetxhekaj.
“Sa i përket emisioneve edukative i kemi dy të tilla dhe do të shtojmë në listë edhe një emision edukativ për fëmijë i cili do të jetë në skenën e re programore nga shtatori e tutje”, ka theksuar Ahmetxhekaj.
Ai u ka thënë të pranishmëve se RTK-ja është kampion sa i përket medieve të tjera për barazi gjinore. “Problemin e vetëm e kemi tek debatet politike”, ka thënë ai.
Debati me qytetarë për raportin e punës së RTK-së do të vazhdoj edhe në 6 qendra të tjera të Kosovës në Prishtinë Prizren, Ferizaj, Mitrovicë, Gjakovë dhe Gracanicë.
