Që nga sot, Radiotelevizioni Publik i Kosovës ka një lokacion të ri për funksionimin e zyrës së saj rajonale në Pejë, falë një hapësire të ndarë nga Komuna, pa asnjë kosto financiare për RTK-në. Memorandumi i Mirëkuptimit për dhënien e këtij lokacioni u nënshkrua sot nga ushtruesi i detyrës së Drejtorit të Përgjithshëm të RTK-së, Hysen Hundozi, dhe kryetari i Komunës së Pejës, Gazmend Muhaxheri.
Hundozi falënderoi autoritetet komunale për ofrimin e hapësirës me kushte të mira pune, duke theksuar se kjo zyrë do të mundësojë një prezencë më të afërt të RTK-së me qytetarët e komunave të Dukagjinit.
“Përmes kësaj zyreje, RTK do të jetë më pranë banorëve për të reflektuar sfidat e përditshme të tyre, por edhe për të promovuar pasuritë kulturore dhe potencialin e jashtëzakonshëm sportiv, turistik dhe ekonomik të kësaj ane të Kosovës,” tha ai.
Drejtuesi i RTK-së, Hundozi, shprehu gjithashtu mirënjohje për Agjencinë Japoneze për Bashkëpunim Ndërkombëtar (JICA), për ndihmën e pakursyer në zhvillimin profesional dhe ngritjen teknike të RTK-së. Sipas tij, “Populli japonez, përmes JICA-s, ka dhënë një ndihmë të jashtëzakonshme për transmetuesin publik. Pa këtë mbështetje, RTK nuk do të kishte kapacitetet teknike që ka sot.”
Ndërkaq kryetari i Pejës Gazmend Muhaxheri, pasi ka falënderuar JICA-n japoneze për ndihmën e saj në hapjen e kësaj zyre rajonale, tha se Komuna e Pejës ka ndarë hapësirat e nevojshme për mbarëvajtjen dhe funksionimin e saj.
“Komuna e Pejës falënderon JICA-n japoneze, organizatë kjo që ka ndihmu për t’u hapur zyra rajonale e RTK-së në Pejë. Komuna e Pejës ka siguruar dy zyra të cilat besoj se do të jenë në shërbim të informimit më të mirë të qytetarëve të Rrafshit të DUKAGJINIT”, tha Muhaxheri.
Në anën tjetër, përfaqësuesi kryesor i JICA-s për Ballkanin, Hajime Fukuda, shprehu mirënjohje për mbështetjen e dhënë nga Komuna e Pejës, jo vetëm për hapësirat e ofruara, por edhe për bashkëpunimin e vazhdueshëm me RTK-në.
“Ky aktivitet është pjesë e Projektit për Zhvillimin e Kapaciteteve të RTK-së – Faza III, dhe këtë vit shënohet një dekadë nga fillimi i bashkëpunimit teknik midis JICA-s dhe RTK-së, që nisi në vitin 2015 me fazën e parë të projektit. Hapja e kësaj zyreje shënon një hap të rëndësishëm në fuqizimin e medias publike në Kosovë, duke mundësuar përfaqësim më të drejtë dhe efikas të zërave nga të gjitha rajonet e vendit.”
Sipas Fukuda-s, themelimi i zyrës në Pejë ka rëndësi të veçantë për disa arsye: Së pari, Peja ka përjetuar fatkeqësi natyrore dhe është e domosdoshme që raportimi për ngjarje të tilla të bëhet në kohë reale dhe nga afër. Së dyti, Peja është një destinacion i rëndësishëm turistik, me natyrë të mrekullueshme dhe trashëgimi botërore të çmuar.
“Një ekspert japonez i JICA-s për turizëm të qëndrueshëm, gjatë një vizite të fundit në këtë qytet, u impresionua nga bukuritë natyrore, organizimi i mirë i guidave turistike dhe infrastruktura”, deklaroi përfaqësuesi i JICA-s për Ballkanin.
Fukuda theksoi se nënshkrimi i këtij Memorandumi të Mirëkuptimit është simbol i një partneriteti të fortë ndërmjet RTK-së dhe autoriteteve lokale, që vendos themele të qëndrueshme për bashkëpunim, ndarje burimesh dhe mbështetje të ndërsjellë, në funksion të suksesit të kësaj nisme.
