Remzi Ejupi i ka dalë në mbrojtje ish-futbollistit të tij tek FC Prishtina, Edon Zhegrovës.
Ylli kosovar së fundmi mbeti jashtë Kombëtares së Kosovës dhe u bë një çështje shkaku i deklaratave që i dha në muajt e fundit dhe pasi mbeti jashtë “Dardanëve” në ndeshjet e fundit.
Ish-presidenti i klubit më të madh në vend ishte ai që e shtyu përpara lojtarin qysh në moshën e adoleshencës, për ta bërë një karrierë të suksesshme në Evropë.
“Në atë kohë, bashkë me anëtarin e Bordit të klubit, Sinan Vllasaliu, u takuam me presidentin e skuadrës së njohur belge, Standard, z. Roland Duchatelet, përmes së cilit ua mundësuam të shkonin në prova lojtarët si Edon Zhegrova, Emir Sahiti, Liridon Latifi e Lorik Aliu”, thotë Ejupi.
Ai ishte mysafir në emisionin “Favorit” dhe e shprehu shqetësimin e tij për trajtimin që po i bëhet futbollistit të Lillet, i cili aktualisht është lojtari më në formë i Kombëtares së Kosovës.
Presidenti më i suksesshëm në futbollin kosovar shprehet se në Federatën e Futbollit të Kosovës ka probleme edhe më të thella sesa ai me Zhegrovën.
“Ky është një dëm jashtëzakonisht i madh. Rasti i Zhegrovës tregon se aty nuk ka atmosferë, aty nuk ka harmoni, aty ka probleme shumë më të thella sesa Zhegrova. Kur ka qenë te Prishtina, Edoni më duket ka qenë 14 vjeçar dhe në atë kohë ishte organizuar ‘Milan Junior Camp në Kosovë’ nga i madhi dhe legjenda italiane, Franco Baresi, me një grup tjetër ish-lojtarësh të mëdhenj të klubit. Ai u vonua për të ardhur në atë kamp, por në fund iu bashkua këtij grumbullimi. Pas një jave erdhi vetë Baresi dhe më tha: ‘shiqoni, këtë 14 vjeçar e keni pasuri kombëtare, ruajeni, trajtojeni, mbajeni mirë se është pasuri kombëtare”, deklaroi fillimisht Ejupi.
“Zhegrova është lojtar që do ta kemi vështirë ta bëjmë prapë. Ai është lojtarë që në Kosovë lind një herë në 40 vjet. Është lojtar që nuk bëhet brenda ditës. Këtë lojtar nuk e ka bërë as Franca, as Belgjika, është bërë këtu. Duhet t’i vlerësojmë edhe trajnerët tanë. Ky ka dalë nga trajnerët kosovarë, ky në Kosovë ka punuar para se të dilte jashtë”, shton presidenti i deridjeshëm i klubit prishtinas.
