F.B.
Real Madrid është duke vazhduar me formën fantastike në La Liga, ku triumfoi bindshëm kundër Osasunas.
“Los Blancos” ishin të hatashëm nga minuta e parë, për të fituar me rezultat 4:0 në “Santiago Bernabeu” në kuadër të xhiros së nëntë në La Liga.
Mesfushori anglez Jude Bellingham i dha epërsinë Realit pas vetëm nëntë minutave duke realizuar nga afërsia pas asistimit të Dani Carvajalit (9’).
I njëjti pastaj dyfishoi epërsinë pas një aksioni shumë të shpejtë, ku Fede Valverde e vendosi përballë portierit mysafir ku anglezi ishte i pagabueshëm (54’).
Real Madrid vazhdoi të dominonte, me Vinicius Junior që realizoi golin e tretë duke dribluar edhe portierin pas një asistimi tjetër të Valverdes (65’).
Fitoren e “Los Blancos” e vulosi qendërsulmuesi Joselu me një goditje precize pas një asistimi të Viniciusit (70’).
Me këtë fitore, Real Madrid mbetet lider i vetëm në kampionatin spanjoll me 24 pikë pas nëntë xhirove, derisa Osasuna renditet në vendin e 10-të me 10 sosh.
