F.B.
Përzgjedhësi i ri i Kombëtares së Kosovës në basketboll, Rami Hadar, ka thënë se është i lumtur që drejton skuadrën dardane.
Ai ka premtuar se do të jep maksimumin për të ndërtuar një skuadër të denjë për t’iu bërë ballë kundërshtarëve.
“Jam i lumtur që jam këtu. Jam krenar që drejtoj Kosovën. Jam krenar që Federata e Basketbollit më zgjodhi mua për ta drejtuar këtë ekip. Lojtarët erdhën me disponim të mirë dhe me harmoni. I kemi bërë vetëm tri stërvitje dhe është ende herët të themi diçka për basketbollin, më pëlqen qëndrimi i tyre dhe shpresoj ta bëjmë një lojë të bukur po ashtu”, ka thënë Hadar për faqen zyrtare të FBK-së.
Hadar ka folur edhe për rivalët e Kosovës në rrethin e tretë parakualifikues të Eurobasket 2025.
“Mendoj se përpara nesh janë dy ekipe të mira, me lojtarë të mirë dhe të njohur. Por, ne duhet të garojmë, ta bëjmë punën tonë dhe puna ime është që t’i fitojë ndeshjet me Kosovën. Dua ta dërgoj ekipin tek përpjekja maksimale, që lojtarët të luajnë për njëri-tjetrin dhe që të luajnë për flamurin”, ka deklaruar Hadar.
Kosova është në grup me Zvicrën e Danimarkën.
