Kanali i parë i Televizionit Publik, drejtor i së cilit është zgjedhur mes zhurmës aktivisti i Lëvizjes Vetëvendosje, Rilind Gërvalla, e ka dhënë kryelajmin e ditës, arrestimin e Kryeshefit të KEK-ut, në minutën e 17-të të lajmeve qendrore. “Shokët” e Gërvallës nga partia, në rrjetet sociale, e kanë akuzuar Prokurorinë dhe Kryeprokurorin se po e ndiqte Kryeshefin që vjen nga radhët e LV-së.
Kryengjarja e ditës së djeshme ishte bastisja e zyrave të udhëheqjes së Korporatës Energjetike të Kosovës dhe arrestimit i Kryeshefit të kësaj ndërmarrjeje, Nagip Krasniqit, nën dyshimet për “Keqpërdorim të detyrës zyrtare”, “Ushtrimin e ndikimit” dhe “Konfliktit të interesit”.
Dhjetë minutat e parë të lajmeve qendrore në televizionin publik i janë dedikuar cështjes së liberalizimit të vizave.
Minutat në vijim të lajmeve të mbrëmshme është përkujtuar marrëveshja e parë e nënshkruar në Bruksel mes Kosovës dhe Serbisë. Më pas, është raportuar për zgjedhjet e jashtëzakonshme, në katër komunat e veriut.
RTK-ja ka qëndruar edhe pak në veri të vendit, duke raportuar për konkursin e rishpallur për vendet e lira në Policinë e Kosovës, në këtë rajon, pas dorëheqjeve masive të qytetarëve serbë nga institucionet publike, në nëntor.
Në minutën e 17-të të edicionit kryesore të lajmeve në RTK u fol për kryengjarjen e ditës, arrestimin e Kryeshefit Ekzekutiv të KEK-ut, Nagip Krasniqin.
Lajmi hapet me njoftimin e Prokurorisë Speciale për arrestimin e Krasniqit dhe dyshimet që janë hedhur mbi të për keqpërdorim të pozitës, ushtrimin e ndikimit dhe konfliktit të interesit. Këtij lajmi, transmetuesi publik ia kishte rezervuar më pak se dy minuta, për të vazhduar me raportimet e tjera të ditës.
Gjatë ditës së djeshme, zyrtarë të lartë të LV-së e kanë mbrojtur Krasniqin, ndërsa kanë sulmuar Prokurorinë e Shtetit. Sot Krasniqin e ka mbrojtur edhe Kryeministri Albin Kurti në Kuvend.
