Në Ditën Ndërkombëtare të Radios, e cila shënohet çdo vit më 13 shkurt për të njohur fuqinë dhe rëndësinë e këtij mediumi si një mjet komunikimi masiv, Radio Kosova solli një lidhje direkte nga ambientet e saj në studion e televizionit në RTK.
Nga ambientet e Radio Kosova, në lidhje direkte në studion e televizionit në RTK, në Ditën Ndërkombëtare të Radios, kanë folur kolegët për punën e tyre ndër vite në radio.
Afërdita Dibra, teknike në Radio Kosovë, ka treguar për punën e saj dhe për metodën e punës si ka qenë në të kaluarën, kur gjithçka ka qenë manuale, ndërsa tani thotë se gjithçka është digjitale dhe shumë më e lehtë.
“Unë punoj prej viteve ’80 në këtë punë. Kam punuar në ish-Radio Prishtina para luftës, ndërsa menjëherë pas luftës kam filluar në Radio Kosovë. Jam teknike në program, kanë ndryshuar shumë gjëra në tekniken e sotit. Më herët kemi punuar me teknikë manuale, ndërsa tani gjithçka është e digjitalizuar. Secila kohë e ka pasur vështirësinë e vet”, tha ajo.
Dibra tregoi edhe për rastet kur ka ndodhur ndonjë e papritur në emision ose në ndonjë lidhje të drejtpërdrejtë, dhe se si u është dashur të gjejnë një zgjidhje për të mbuluar gabimin në bashkëpunim mes kolegësh.
“Ka ndodhur ndonjëherë që kemi harruar mikrofonin të ndezur dhe na është dashur të gjejmë një zgjidhje për ta mbuluar ne kolegun gazetar ose edhe ai neve na ka mbuluar. Normalisht, këto gjëra ndodhin në punën tonë, sidomos kur jemi live,” shton Dibra.
Ndërsa në pjesën e gazetarëve, mysafirë ishin gazetarja Meribane Dushi, gazetare në Radio Kosovë, dhe redaktori Agush Alihajdari, të cilët treguan vështirësitë në punën e tyre dhe kënaqësitë që u fal puna që bëjnë.
“Radio ka avancuar mjaft në aspektin e zhvillimit teknologjik. Është lehtësuar shumë edhe puna e gazetarëve. Në kohën tonë, unë dhe Agushi kemi pasur shumë vështirësi të arrijmë deri te informacioni, ndërsa tani me një klik në internet ke mundësi të kesh qasje në informacion. Për ne, mikrofoni ka qenë i shenjtë, dhe edhe sot e kësaj dite është i tillë, sepse kemi një ndjenjë të madhe përgjegjësie në momentin që gjendemi para tij”, tha Dushi, e cila po ashtu shtoi se radio i fal shumë kënaqësi pasi njerëzit e njohin vetëm nga zëri.
Derisa Agush Alihajdari tha se radio e ka një magji interesante.
“Radio e ka një magji interesante. Është shpejtësia e saj, është depërtimi në çdo cep dhe dashuria ndaj saj pa asnjë dilemë”, theksoi Alihajdari.
