Veteranët e UÇK-së do të vazhdojnë të marrin të njëjtin pension. Kjo pavarësisht se pritet që me miratimin e Ligjit për pagën minimale, kjo e fundit të rritet.
Veteranët nuk do të jenë pjesë e ndryshimeve në Ligjin për pagën minimale, edhe pse kanë kërkuar me ngulm e protesta që të përfshihen brenda këtij ligji.
Nga Zyra e Kryeministrit kanë thënë se pa kthimin e aplikacioneve të veteranëve që mbahen në Prokurorinë Speciale nuk mund të bëhet edhe kategorizimi i veteranëve sipas ligjit aktual.
“Siç jeni të informuar, aplikacionet e veteranëve vazhdojnë të mbahen në Prokurorinë Speciale të Republikës së Kosovës. Derisa Prokuroria nuk i kthen aplikacionet, ZÇKDL-ja në kuadër të ZKM-së nuk ka mundësi ta bëjë kategorizimin sipas ligjit aktual. I njëjti ligj, sipas plotësim ndryshimeve të vitit 2017, nuk parasheh më ndërlidhjen në mes pensionit të veteranit dhe pagës minimale”, ka thënë për Front Online Aziz Bici, këshilltar për çështje të kategorive të dala nga lufta e UÇK-së.
“Aktualisht për muajin janar/2023 numri i veteranëve që marrin pension është 36,767. Sipas ligjit ZÇKDL-ja në kuadër të ZKM-së bën përditësimin e listave, në bazë të vendimeve të gjykatës kompetente. Deri me sot nuk ka pasur asnjë vendim nga gjykata që duhet ta largojmë si person të rrejshëm”, thuhet në përgjigjen e ZKM-së.
Projektligji për pagën minimale, i miratuar në parim, që do t’i hapte rrugë rritjes së pagës minimale në Kosovë, ka mbetur aty ku ka qenë në qershor.
Ky projektligj parasheh rritjen e pagës minimale në 264 euro bruto, ose 250 euro neto, nga 130-170 sa është aktualisht.
