F.B.
Qeveria e Kosovës ka mbajtur sot në mënyrë elektronike, mbledhjen e radhës në të cilën ka ndarë rreth 13 milionë euro për subvencionimin e teksteve shkollore për nxënësit e klasave 1 -5 dhe për materialet mësimore nga klasat 6-9.
“6, 323,380 (gjashtë milionë e treqind e njëzetë e tre mijë e treqind e tetëdhjetë) euro për subvencionimin e teksteve shkollore për klasat 1-5, dhe 6,617,340 (gjashtë milionë e gjashtëqind e shtatëmbëdhjetë mijë e treqind e katërdhjetë) euro për subvencionimin e materialeve mësimore për klasat 1-9”, thuhet në njoftimin e ekzekutivit.
Kujtojmë se deri të martën mbrëma në portalin e-Kosova janë pranuar rreth 80 mijë aplikime. Ministrja e Arsimit, Shkencës, Teknologjisë dhe Inovacionit, Arbërie tha se platforma do të mbetet e hapur deri në fund të muajit shtator, derisa i siguroi prindërit se paratë për librat dalin deri më 1 shtator.
