Qeveria në detyrë në mbledhjen e sotme ka miratuar vendimin për ndarjen e bursës së mobilitetit për nivelin Bachelor, si përkrahje për studentët me kushte ekonomike më të dobëta. Qeveria në detyrë ka ndarë 26 milionë euro për studentët. Ajo ka miratuar ndarjen nga 100 eurove për të gjithë studentët.
“Sot do të miratojmë edhe përmbushjen e një prej premtimeve kyçe të Qeverisë Kurti III, atë të bursës së mobilitetit për student të nivelit Bachelor. Kjo bursë do të jetë masë e përhershme dhe mbështetje e vazhdueshme për studentët në nevojë. Shuma e mbështetjes do të varet nga distanca ndërmjet vendbanimit dhe vendit ku ju studioni. Sa më larg që ta keni universitetin ku studioni, aq më e madhe do të jetë mbështetja”, ka thënë kryeministri në detyrë, Albin Kurti.
Ministri në detyrë i Financave, Hekuran Murati, ka thënë se kjo mbështetje do të mundësohet përmes shtimit të masës 3.8 në pakon e ringjalljes ekonomike si dhe përfshinë një planifikim deri në 26 milionë euro.
Gjithashtu qeveria në detyrë ka miratuar vendimin për ndarjen e 100 eurove për çdo studentë, si masë e menjëhershme.
“Përderisa formimi i institucioneve të reja nga zgjedhjet e 9 shkurtit ende mbahen pezull, ekonomia e vendit vazhdon të rritet duke shënuar rritje prej 4.58% të bruto produktit vendor në tre mujorin e dytë të këtij viti. Bashkë me ekonominë rriten edhe të hyrat buxhetore, të cilat gjithashtu kanë shënuar rritje prej 10% krahasuar me vitin paraprak”, ka thënë Kurti.
Po ashtu Qeveria e Kosovës ka miratuar Programin për Mbrojtjen e Konsumatorëve të Cenueshëm të Energjisë Elektrike, të propozuar nga Ministria e Financave, Punës dhe Transfereve, me qëllim mbështetjen e familjeve me të ardhura të ulëta gjatë sezonit të dimrit.
Ministri në detyrë i Financave, Punës dhe Transfereve, Hekuran Murati, tha se me kthimin e stinës së dimrit, programi do të riaktivizohet për të ndihmuar familjet që nuk kanë mundësi të përballojnë pagesën e plotë të energjisë elektrike.
“Me kthimin e stinës së dimrit kthehet ky program. Subvencionohen faturat e plota ose një pjesë e faturës. Ata që mund të përfitojnë janë familjet që kanë të ardhura më të ulëta se 150 euro në muaj për person. Vitin e kaluar kemi pasur mbi 80 mijë familje përfituese,” tha Murati.
