Qeveria e Kosovës ka marrë vendim që të mbështesë me një pako të re prej 3 milionë eurosh, komunitetet jo-shumicë.
Ky vendim është marrë sot gjatë një takimi që kryeministri Albin Kurti, zhvilloi me zëvendëskryeministren për Çështje të Pakicave dhe Drejtat e Njeriut, Emilja Redžepi, ministri i Financave, Punës dhe Transfereve, Hekuran Murati, ministri për Komunitete dhe Kthim, Nenad Rašić dhe këshilltaren e kryeministrit për Çështje të Komuniteteve, Elizabeth Gowing.
Sipas njoftimit të Qeverisë, gjatë këtij takimi janë dokorduar për pakon e re mbështetëse për komunitetet jo-shumicë në vend.
“Kjo pako, që për fillim do të jetë në vlerë prej 3 milionë euro, përmban masa mbështetëse për: vende të reja të punës për bizneset ekzistuese dhe të reja; bujqit dhe prodhuesit e vegjël në zonat rurale; shoqërinë civile që kontribuon në integrimin dhe afirmimin e komuniteteve jo-shumicë”, njofton qeveria.
Miratimi i saj pritet të bëhet në mbledhjen e radhës së Qeverisë.
“Pakoja synon që përmes punësimit dhe prodhimit të kontribuojë drejtpërdrejt në zhvillimin, mirëqenien dhe integrimin sa më të plotë të komuniteteve jo-shumicë në Republikën e Kosovës”, thuhet në njoftimin e qeverisë.
