PSD-ja sot ka zhvilluar një aksion para objektit të Qeverisë së Kosovës, në ditën kur janë bërë dy vjet nga fitorja e Lëvizjes Vetëvendosje.
Sipas PSD-së, janë dhënë shumë premtime e fjalë, por gjatë këtyre dy vjetëve nuk është bërë asgjë.
“Rrahje gjoksi e rritje e mendjes; shumë fjalë, shumë numra, shumë shifra. Para 2 vjetëve na thanë se ndodhi diçka e madhe, e jashtëzakonshme. A e dini çfarë ndodhi para 2 vjetëve? Bash asgjë. Sot është 14 shkurti. Sot kalon gjysmë mandati i kësaj qeverie”.
“Kjo Qeveri nuk e ka pasur programin transformues. Edhe sikur ta zbatonte s’do të bëhej nami. Problemi është që këta as nuk kanë filluar. Nuk ia kanë ba vijë.
I kanë premtuar 160 çerdhe të reja. Nuk është asnjë. Nuk ia kanë ba vijë.
I kanë premtuar 2000 banesa për çifte të reja. Nuk kemi as gur themel. Nuk ia kanë ba vijë.
Kanë premtuar pesëfishimin e numrit të inspektorëve të punës. Nuk ia kanë ba vijë.
Kanë premtuar rregullim të shëndetësisë. Kanë thënë s’do të ketë mungesë barnash, dhe do të fillojnë sigurimet shëndetësore. Nuk ia kanë ba vijë. Gjendja është veç më e rëndë”, tha përfaqësuesi i PSD-së.
Sipas PSD-së, asgjë më keq s’ka mundur t’i ndodhë ditës së dashurisë sesa “ky shpërfytyrim kolosal, kjo gënjeshtër e madhe”.
