Prishtina e ka fituar derbin e xhiros së 15-të të Superligës së futbollit.
Kryeqytetasit e fituan derbin Bardhekaltër pasi e mposhtën Dritën me rezultat minimal 1:0.
Golin e fitores për Prishtinën e shënoi Jalen Blesa në pjesën e dytë nga penalltia, shkruan “Gazeta Express”.
Gjilanasit nga ana e tyre nuk arritën të shënonin përkundër rasteve të krijuara në ndeshjen e zhvilluar në Kampin Nacional në Hajvali.
Kjo humbje e lë Dritën në vendin e tretë në tabelë, kurse Prishtina ngritet në pozitën e katërt pas këtij trepikëshi.
Kjo ndeshje ishte paraparë të zhvillohej në fundjavë, por ishte shtyrë shkaku i reshjeve të borës.
Ndërkohë, Feronikeli 74’ e “fundosi” edhe më shumë Lirinë, të cilën e mposhti me rezultat 2:1.
Shillova dhe Hajdari në fund i shënuan golat për skuadrën nga Drenasi, kurse golin e pamjaftueshëm për prizrenasit e realizoi Topallaj, i cili e barazoi përkohësisht rezultatin.
Kjo humbje e lë Lirinë në vendin e fundit në tabelë, kurse “Nikli” ngritet në pozitën e shtatë falë kësaj fitoreje.
Nesër do të mbyllet xhiroja e 15-të me ndeshjen mes Fushë Kosovës dhe Dukagjinit, po ashtu e shtyrë shkaku i borës, e cila do të luhet në Lipjan.
