F.B.
Prishtina do të bëhet me stadium të ri të futbollit.
Kryetari i Komunës së Prishtinës, Përparim Rama është takuar sot me kryetarin e Federatës së Futbollit të Kosovës, Agim Ademi, me ç’rast është diskutuar rreth projektit për ndërtimin e stadiumit të ri në kryeqytet.
Ky takim kishte për qëllim koordinimin ndërinstitucional për ndërtimin e këtij stadiumi të rëndësishëm për futbollin kosovar dhe komunitetin e Prishtinës në përgjithësi.
Ata u dakorduan për të bashkëpunuar në realizimin e këtij projekti të rëndësishëm për sportin kryeqytetas dhe jo vetëm.
Stadiumi i ri, i cili do të ndërtohet në Bërnicë, do të jetë i kategorisë së katërt dhe do t’i plotësojë të gjitha standardet dhe kushtet e nevojshme për organizimin e ndeshjeve ndërkombëtare, përkatësisht të ndeshjeve të ekipit kombëtar dhe klubeve në garat evropiane.
