Prokuroria Speciale e Kosovës ka ngritur aktakuzë kundër 12 policëve dhe 2 doganierëve për marrje ryshfeti në pikën kufitare me Shqipërinë në “Qafë Prush” si dhe për lejim të kalimit të kufirit pa dokumente zyrtare. Këta zyrtarë policorë e doganorë, sipas aktakuzës, kanëp shkaktuar vepër penale.
“Prokuroria Speciale e Republikës së Kosovës (PSRK), ka ngritur aktakuzë në Gjykatën Themelore në Prishtinë kundër dymbëdhjetë zyrtarëve policorë të Stacionit Policor për Mbikëqyrje të Kufirit “Qafë Prush”, dhe kundër dy zyrtarëve doganorë, në kuadër të Drejtorisë Rajonale të Policisë Kufitare, për shkak të dyshimit të bazuar mirë se e kanë kryer veprën penale “Marrja e ryshfetit” e sanksionuar me nenin 421 të Kodit Penal”, thuhet në njoftim.
Sipas Prokurorisë Speciale, të akuzuarit në cilësinë e personave zyrtarë kanë marrë ryshfet nga qytetarët e Republikës së Shqipërisë dhe Republikës së Kosovës, me rastin e kalimit në pikat kufitare “Qafë Prush”.
Sipas aktakuzës, ata kanë lejuar hyrjen e personave në territorin e Kosovës, pa i verifikuar dhe pa i kontrolluar, nëse i plotësojnë kushtet ligjore për hyrje dhe dalje nga territori i Republikës së Kosovës, sipas legjislacionit në fuqi.
