F.B.
Reprezentuesi shumëvjeçar i Kosovës, Enis Kabashi, ka vendosur t’i jap fund karrierës si hendbollist.
Por 33-vjeçari do të mbetet në sportin e hendbollit.
Kabashi ka pasur karrierë shumë të suksesshme si hendbollist. Ka nisur te Trepça, ndërsa për shumë vjet ishte te Prishtina e po ashtu te Besa e Pejës. Ka fituar shumë trofe në hendbollin kosovar, ndërsa ishte edhe më i miri i vitit.
Kabashi ka nëntë vjet që luan dhe vepron në Gjermani. Prej fillimisht ishte te skuadra TG Landshut Handball, ku çmohet për kontributin e dhënë.
“Jam tërhequr nga hendbolli aktiv. E kam kryer provimin për trajner të nivelit C në Gjermani dhe jam duke e ushtruar ekipin U18 të klubit gjerman Landshut. Klubin ku kam luajtur plot nëntë vjet po e lë në moment shumë të mirë. Jemi bërë kampionë këtë edicion dhe kemi hyrë në ligën e tretë gjermane. Në ligën e tretë niveli është më i lartë dhe duhet të udhëtohet goxha larg. Edhe lëndimet që i kam pasur janë prej arsyeve që kam vendosur t’i jap fund karrierës si lojtar. Hyrja në ligën e tretë ishte synimi kryesor prej që kam ardhur dhe jam i lumtur që ia dolëm”, ka thënë Kabashi.
Federata e Hendbollit e Kosovës e falënderon Enisin për kontributin shumëvjeçar në hendbollin tonë dhe në Kombëtaren e Kosovës, ndërsa i dëshiron suksese në karrierën si trajner.
