Partia Demokratike e Kosovës ka thënë se nuk do të vazhdojnë të bashkëpunojnë me lëvizjen Vetëvendosje në Kuvend derisa sipas tyre kryetare e këtij grupi është një person që koordinimin për vendimmarrjen në Kuvend e bënë me kryeterroristin Milan Radoiçiq.
Shefi i Deputetëve të PDK-së, Abelard Tahiri në një konferencë për media bëri të ditur se do të kërkojnë që seanca e paraparë për sot të shndërrohet në debat ku do të hidhej dritë mbi këtë çështje.
“Ne do të kërkojmë që të gjitha pikat të zhvendosen. Sot duhet tu jepet mundësi të gjithë deputetëve të diskutojnë për këtë çështje. Duhet të hidhet dritë e të nxirren fakte të reja. Përpos këtyre dy çështjeve përpos faktit që kryeterroristi Radoiciq na ka përcaktuar pagën minimale dhe që paska pasur edhe kandidat të tij për Gjykatë Kushtetuese nga radhët e shqiptarëve, cilat janë kërkesat që i janë plotësuar Milan Radoiçiqit”, tha ai.
Tahiri e quajti të kontaminuar e të kriminalizuar këtë legjislaturë.
“Vendimmarrjen na ka përcaktuar kryeterroristi Milan Radoiciq e krejt këtë situatë e bënë më të rëndë fakti që kryeterroristi Milan Radoiqiq ëhstë vrasësi direkt i policit tonë Afrim Bunjaku apo mund të jetë njëri nga ushtarët e tij. Si mund të vazhdojë një normalitet e si mund të vazhdojë kjo legjislaturë punën e saj kur kemi aq thellë të involvuar terroristë të tillë, një njeri që është në listën e zezë të SHBA për shkak të aktiviteteve kriminale”, tha Tahiri.
Kryetari i Aleancës për Ardhmërinë e Kosovës, Ramush Haradianj ka theksuar se është hera e parë në historinë e Kosovës, që është bashkuar vota e shqiptarëve me serbë në Listën Serbe kundër UÇK-së, është Albin Kurti.
“Është vërtetuar se për këtë votë janë marrë vesh mbas shpinës së Kosovës, kjo tregon që Kosovën e udhëheq njeriu i Serbisë”, u shpreh Haradinaj.
