Për shkak të parashikimeve nga Instituti Hidrometeorologjik i Kosovës, për reshje të shumta të shiut, paralajmërohen vërshime në veriperëndim të vendit tonë. Agjencia për Menaxhimin e Emergjencave udhëzoi gatishmëri për Qendrat e Menaxhimit të Emergjencave në nivel vendi.
Sipas Institutit Hidrometeorologjik të Kosovës mbi vendin tonë parashihen reshje shiu të intensitetit mesatar deri të lartë, ku pritet të këtë edhe vërshime në zonat veriore, veriperëndimore dhe perëndimore të vendit. Besim Aliu, koordinator dhe Parashikues i Motit në Agjencinë e Mbrojtjes së Mjedisit të Kosovës në Ministrinë e Mjedisit, Planifikimit Hapësinor dhe Infrastrukturës, tha për Radio Kosovën se toka është e ngopur me ujë nga reshjet e mëparshme, prandaj edhe vendet më të ulëta janë të rrezikuara nga vërshimet.
“Vendet si Peja, Istogu, Gjakova, Klina dhe pjesët që janë më të ulëta të Dukagjinit”, tha ai.
Aliu bëri të ditur se pas reshjeve të shiut do të këtë ulje të temperaturave dhe do të këtë reshje optimale bore.
“Pas këtyre reshjeve do te kemi ulje të temperaturave. Gjë që reshjet e ardhshme do te jenë në formë dëbore me që temperaturat minimale do të kalojnë ne temperatura negative dhe kushtet për reshje dëbore do të jenë optimale.”
Bazuar në paralajmërimin nga Instituti Hidrometeorologjik i Kosovës për vërshime ne ditët në vijim, dhe me qëllim të gatishmërisë së institucioneve dhe Strukturave për Mbrojtje Shpëtim dhe Ndihmë, Agjencia e Menaxhimit Emergjent udhëzon për ngritje të gatishmërisë në nivel vendi për të gjitha qendrat operative emergjente, zjarrfikësit dhe drejtoritë komunale për mbrojtje dhe shpëtim.
