Papa Françesku ka miratuar zyrtarisht lejimin e priftërinjve, që të bekojnë çiftet e të njëjtit seks, me një dokument të ri që shpjegon një ndryshim rrënjësor në politikën e Vatikanit. Ky lajm që konsiderohet historik për Vatikanin, thuhet se ka bërë një ndryshim rrënjësor në politikat e Kishës katolike, pasi deri më tani kjo ishte kundërshtuar.
Sipas Papës, njerëzit që kërkojnë dashurinë dhe mëshirën e Zotit, nuk duhet t’i nënshtrohen “një analize morale shteruese për ta marrë atë”.
Dokumenti nga zyra e doktrinës së Vatikanit, i publikuar të hënën, shtjellon një letër që Papa Françesku ia dërgoi kardinalëve konservatorë. Në atë përgjigje paraprake, Françesku sugjeroi që bekime të tilla mund të ofroheshin në disa rrethana, nëse nuk ngatërronin ritualin me sakramentin e martesës.
“Në fund të fundit, një bekim u ofron njerëzve një mjet për të rritur besimin e tyre te Zoti”, thuhet në dokument. “Është një farë e Shpirtit të Shenjtë që duhet të ushqehet, jo të pengohet”, thuhet më tej.
Vatikani mendon se martesa është një bashkim i pazgjidhshëm midis burrit dhe gruas. Si rezultat, ajo ka kundërshtuar prej kohësh martesën e të njëjtit seks.
Dhe në vitin 2021, Kongregacioni i Vatikanit për Doktrinën e Besimit tha në mënyrë të prerë, se kisha nuk mund të bekonte bashkimet e dy burrave ose dy grave.
Papa Françesku ka sugjeruar në një letër drejtuar pesë kardinalëve konservatorë se mund të ketë mënyra për të bekuar bashkimet e të njëjtit seks brenda katolicizmit dhe sugjeron që bekime të tilla mund të studiohen nëse nuk ngatërrohen me martesën sakramentale.