F.B.
Presidentja e Kosovës, Vjosa Osmani, ka udhëtuar për në Turqi, ku me ftesë të presidentit të Republikës së Turqisë, Recep Tayyip Erdoğan, do të marrë pjesë në Forumin Diplomatik të Antalisë.
Bëhet e ditur se gjatë Forumit, presidentja Osmani do të jetë folëse në panelin kryesor të liderëve, me temën e forumit të sivjetmë: “Avancimi i diplomacisë në kohë trazirash”.
“Përgjatë punimeve të Forumit, presidentja Osmani do të takohet edhe me homologë nga disa vende të botës, pjesëmarrës të forumit”, thuhet në njoftimin e zyrës për informim të Presidencës.
Forumi Diplomatik i Antalisë është takim i nivelit të lartë, në të cilin adresohen sfidat ndërkombëtare dhe në të cilin marrin pjesë liderë shtetesh, diplomatë dhe akademikë. Forumi i sivjetmë do t’i zhvillojë punimet prej 1deri më 3 mars.