Presidentja e Kosovës, Vjosa Osmani dhe kryetari i Kuvendit, Glauk Konjufca janë pritur të martën në familjen e heroit Jusuf Gërvalla, në fshatin Dubovik të Deçanit.
Në një postim në Facebook, Osmani ka shkruar se u pritën sot nga e bija e heroit Jusuf Gërvalla, zv.kryeministrja Donika Gërvalla.
Ajo tha se emrat e Jusufit, Bardhoshit e Kadriut janë referencë se si një jetë e tërë vihet në shërbim të atdheut.
“Liria mbanë edhe emrat e Jusufit, Bardhoshit e Kadriut, kurse ne mbajmë të skalitur emrat e tyre jo vetëm në kujtesë, por edhe si referencë se si një jetë e tërë vihet në shërbim të atdheut!”
Presidentja Osmani theksoi se Jusufi ishte jo vetëm një zë i veçantë në letërsi, gazetari e muzikë, por mbi të gjitha zëri i të vërtetës dhe lirisë sonë.
“Ai lindi artist, veproi si patriot e vdiq si hero. Gërshetimi i këtyre tri tipareve e shndërroi Jusufin në një personalitet poliedrik, një ikonë të kohës, një patriot që ëndrrën për liri e projektoi herët.I përjetshëm qoftë kujtimi për Jusuf e Bardhosh Gërvallën dhe Kadri Zekën!”, ka shkruar Osmani në Facebook.
