Menjëherë pas u nënshkrua akti ligjor i Bashkimi Evropian për liberalizimin e vizave për Kosovën, ka reaguar presidentja Vjosa Osmani, e cila falënderon kryetaren e Parlamentit Evropian për nënshkrimin e sotëm.
“Faleminderit e dashur Roberta për mbështetjen tuaj të palëkundur dhe mbajtjen e premtimit të dhënë për popullin e Kosovës”, ka shkruar Osmani.
Me nënshkrimin e sotëm në Bruksel qytetarëve të Kosovës u mundësohet lëvizje të lirë në Zonën Schengen më së voni nga 1 janari i vitit 2024. Ceremonia u drejtua nga kryetarja e Parlamentit Evropian, Roberta Metsola.
“Moment krenarie për Parlamentin Evropian, pasi sot e dhamë dritën jeshile përfundimtare për liberalizimin e vizave për Kosovën. Kjo do t’ua lehtësojë jetën qytetarëve të Kosovës, për të udhëtuar, për të bërë biznes si dhe për t’i forcuar lidhjet me bashkëqytetarët evropian”, ka shkruar në Twitter Roberta Metsola, presidente e Parlamentit Evropian.
