Presidentja e Kosovës, Vjosa Osmani kërkoi nga anëtarët e Presidencës së Bosnje e Hercegovinës, Zhelko Komshiq dhe Denis Beqiroviq ratifikimin e Marrëveshjeve të Procesit të Berlinit. Këto marrëveshje, siç tha Osmani, lehtësojnë komunikimin dhe rrisin shkëmbimet ndërmjet Kosovës dhe Bosnje e Hercegovinës.
Këto deklarata presidentja Osmani i bëri në kuadër të takimeve bilaterale përgjatë takimit të liderëve të rajonit të Procesit Bërdo-Brijuni që po mbahet në Shkup.
Ajo u ka thënë liderëve të Bosnjës e Hercegovinës se ratifikimi i marrëveshjeve të Procesit të Berlinit nga Parlamenti i Bosnje e Hercegovinës, një obligim që rrjedh nga nënshkrimi i marrëveshjeve në nëntorin e vitit të kaluar.
“Ratifikimi i marrëveshjeve që dalin nga ana e autoriteteve të BeH është, përveç një obligim edhe domosdoshmëri që do ta ndihmojë lëvizjen e lirë të qytetarëve të të dy shteteve që do t’i kontribuonte rritjes së komunikimit dhe shkëmbimeve ndërmjet dy popujve”, ka deklaruar Osmani.
Kuvendi i Kosovës dhe katër shtetet e rajonit, sipas presidentes Osmani, i kanë ratifikuar marrëveshjet e Procesit të Berlinit, njëra nga të cilat parasheh lëvizjen vetëm me letërnjoftime me Bosnjën dhe Hercegovinën, ndaj është radha që të njëjtin veprim ta bëj edhe BeH-ja.
Po ashtu, Osmani vlerësoi se lidhja e marrëdhënieve diplomatike ndërmjet dy shteteve do t`i shtonte mundësitë për thellim të bashkëpunimit bilateral në të gjitha fushat e interesit te dyanshëm. Në fund Osmani ka theksuar se arritja e vizionit të përbashkët e të dy shteteve për të qenë pjesë e familjes euroatlantike do t`i kontribuonte paqes, stabilitetit dhe prosperitetit afatgjatë të rajonit.
