Presidentja e Kosovës, Vjosa Osmani, u ka bërë thirrje ndërkombëtarëve që të dënojnë tendencat destabilizuese të Serbisë e të mos i barazojnë palët, kur dihet kush është agresori.
Në një takim me të dërguarin e posaçëm të Mbretërisë së Bashkuar për Ballkanin Perëndimor, Stuart Peach, të enjten, Osmani ka thënë se institucionet e Kosovës janë të përkushtuara dhe angazhuara për paqe e siguri.
“Presidentja Osmani vuri në pah se Kosova vazhdon të jetë e koordinuar me partnerët ndërkombëtar për adresimin e sfidave të sigurisë dhe në këtë kontekst ka kërkuar përfshirje më të madhe të Britanisë së Madhe si një anëtare kyçe e NATO-s dhe një partnere historike e Kosovës. Teksa e ka njoftuar për zhvillimet e fundit në vend, Lordin Peach, Presidentja Osmani ka theksuar se Kosova në vazhdimësi është palë konstruktive në raport me dialogun me Serbinë, porse pala serbe nëpërmjet përpjekjeve për destabilizim të Kosovës përpiqet ta zhvendosë fokusin nga dialogu. Në këtë frymë, Presidentja Osmani ka kërkuar që ndaj tendencave destabilizuese të Serbisë, bashkësia ndërkombëtare ta mbajë një qëndrim unik duke dënuar veprime e tilla dhe duke mos bërë barazimin e palëve kur dihet qartë se kush është agresori”, thuhet në njoftimin e Presidencës për takimin Osmani-Peach.
Osmani ka thënë se në veri të Kosovës ligji po sfidohet nga banda kriminale të dirigjuara nga lidershipi i Serbisë e nga banda që ndodhen në listën e zezë të SHBA-së dhe Britanisë së Madhe.
“Kësisoj, Presidentja Osmani theksoi se është nën përgjegjësinë e institucioneve të Kosovës në koordinim me partnerët ndërkombëtarë për ta siguruar sundimin e ligjit, paqes dhe sigurisë në mënyrë të barabartë në të gjithë Republikën e Kosovës dhe për të gjithë qytetarët pa dallim”, njofton Presidenca.
