Shtatë zyrtarë komunal dhe një operator ekonomik dyshohen se kanë keqpërdorur detyrën zyrtare, duke ndikuar në tenderin e mirëmbajtjes së objekteve të komunës së Prizrenit, në kundërshtim me ligjin për prokurim publik.
Prokuroria Themelore në Prizren, Departamenti i Krimeve të Rënda, ka ngritur aktakuzë kundër 8 personave, për shkak të dyshimit se në bashkëkryerje kanë keqpërdorur pozitën ose autoritetin zyrtar.
Të pandehurit janë zyrtarë të Komunës së Prizrenit, shumica nga Drejtoria e Administratës.
Shefi i grupit parlamentar të Vetëvendosjes në Prizren, Karanfil Haxhillari, thotë se kjo aktakuzë vërteton atë që Vetëvendosje në Prizren e ka thënë për katër vite.
Nga dega e Lidhjes Demokratike e Kosovës në Prizren, nuk kanë qenë të gatshëm të deklarohen, ndërsa i kanë quajtur të mjaftueshme reagimet në rrjetet sociale. As nga shoqëria civile nuk ka pasur një reagim për ngritjen e kësaj aktakuze nga Prokuroria e Prizrenit.
Duke pasur parasysh se në këtë aktakuzë dyshohen gjashtë persona zyrtarë edhe një drejtor i kabinetit të qeverisë lokale në Prizren, RTK disa herë ka kërkuar që të ketë një përgjigje nga përgjegjësit në fjalë, por as këta nuk kanë qenë të gatshëm të deklarohen.
Sipas aktakuzës, më datë 4.8.2022 në kohë të pacaktuar, të akuzuarit në cilësinë e personave zyrtarë, për vlerësimin e ofertave në tenderim, renovim dhe mirëmbajtje të objekteve të komunës së Prizrenit, nuk i kanë përmbushur detyrat e tyre zyrtare, duke i mundësuar përfitim grupit të operatorit ekonomik.
Prokurori i çështjes me rastin e ngritjes së aktakuzës, i ka propozuar gjykatës, që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit të shpallen fajtorë dhe të dënohen sipas ligjit.
