Pas Prizrenit dhe Mitrovicës, RTK nis procesin e hapjes së zyrës rajonale në Pejë. Si në dy projektet paraprake, donatori kryesor është Agjencia Japoneze për Zhvillim Ndërkombëtar. Marrëveshja për hapjen e kësaj zyreje u nënshkrua në RTK, ku u theksua se përmes këtij projekti, RTK do të jetë më afër qytetarëve të rajonit të Dukagjinit.
Së shpejti, Radio Televizioni i Kosovës do të hap zyrën rajonale në Pejë.
Ky projekt do të realizohet fal ndihmës së Agjencisë japoneze për Bashkëpunim Ndërkombëtar, JICA, të cilët në vazhdimësi kanë mbështetur zhvillimin e transmetuesit publik.
Marrëveshja u nënshkrua nga drejtori i Përgjithshëm Shkumbin Ahmetxhekaj dhe Fukuda Hajime – Përfaqësues i Lartë i Zyrës Ballkanike JICA.
Drejtuesit e RTK-së thanë së ky projekt është jetik dhe ekzistencial për të ardhmen e televizionit publik.
Besnik Boletini, kryetar i Bordit të RTK-së, tha se sot po hapet zyra rajonale në Pejë që do të mundësojë shtrirje më të mëdha në terren, në komuna më të vogla, për të raportuar për zhvillime, për ngjarjet për jetën.
“Është një hap shumë i rëndësishëm për ne dhe do të shohim mundësitë për të investuar vetë, por edhe të marrim projekte të tjera në mënyrë që RTK-ja të shpërndahet në zyra rajonale. Kjo, praktikisht, i ndihmon edhe stafit të RTK –së që vijnë nga anë të caktuara dhe të punojnë atje dhe produktin e dërgojnë në kohë reale, në qendër, në Prishtinë”, tha Boletini.
Ndërkaq drejtori i përgjithshëm i RTK-së, Shkumbin Ahmetxhekaj, tha se RTK fitoi sërish këtë projekt me rëndësi ekzistenciale, sepse, shtoi ai, po shtrihemi, po zgjerohemi.
“Po flasim për një rajon jashtëzakonisht të rëndësishëm për Kosovën, pra për rajonin e Dukagjinit, me qendër në Pejë, ku do të mbulojmë të gjitha komunat përreth. Kjo nënkupton që, tash, ne të mbledhim forcat tona dhe të hapim zyrën tjetër rajonale në Gjilan dhe me këtë të përmbyllim fazën e parë të zgjerimit të RTK-së dhe në të ardhmen shpresoj që këto zyre rajonale të kenë mundësi funksionale të prodhojnë program vetanak për qytetarët e këtyre anëve”, tha Ahmetxhekaj.
Kurse Fukuda Hajime, përfaqësues i Lartë i Zyrës Ballkanike JICA tha se kjo agjenci ka mbështetur, RTK-në si transmetues publik që ofron informacione të balancuara.
“JICA ka mbështetur RTK-në si transmetues publik që ofron informacione të balancuara, të drejta e neutrale për të gjithë qytetarët e Kosovës. Nga asistenca jonë përgjatë viteve të kaluara, kemi pasur shumë arritje nga bashkëpunimi mes JICA-s dhe RTK-së por ende ka shumë për të bërë. Pra nëse sapo kemi nënshkruar marrëveshjen për fazën tjetër të projektit dhe presim të kemi bashkëpunim në të ardhmen”, tha ai.
Yamanaka Keisuke, i ngarkuar me punë në Ambasadën e Japonisë, në Prishtinë, tha se është i lumtur për këtë bashkëpunim.
“Së pari jemi shumë të lumtur të shohim këtë bashkëpunim dhe sot nënshkruam marrëveshjen për fazën tjetër. Jemi shumë krenarë për këtë. Edhe në Japoni kemi NHK-në, transmetues të njëjtë publik. Jam i sigurte se edhe RTK do të krijojë programe shumë të mira”, tha Keisuke.
I ngarkuari me punë në Ambasadën e Japonisë në Kosovë dhe përfaqësuesi i JICA-s, kanë vizituar edhe disa nga ambientet e punës në Radiotelevizionin e Kosovës, ku kjo organizatë ka investuar në teknologji dhe trajnime për stafin e RTK-së.
Faza e parë e këtij projekti ndërmjet JICA-a dhe RTK-së pati filluar në vitin 2015 dhe ka zgjatur deri në vitin 2019, kurse faza e 2-të nga viti 2021 deri në vitin 2024, faza e tretë pritet të nisë në vitin 2024 dhe do të zgjasë 2 vjet. RTKlive
